Sasudah sumbayang tarawih, ramilah urang di kadai sutan salamaik. Ado nan mamintak kupi ado nan mamintak teh talua.
“Kito aduak lah domino tu agak salakak, ba’a nyo malin.” Ajak si bujang ka Malin Kalapia.
Nan Tuangku Pono bamandan jo si Bujang, sadangkan Malin Kalapia bamandan jo Labai Dullah.
Domino dikacau dek Labai Dullah.
Disusun batu kamari tujuah, nan balak kosong turun partamo.
Sambia maisok rokok ilegal, kupi takacau teh talua pun diminum dek rang nan main domino, malapeh latiah jo panek puaso nan sahari cako.
“Ba,a ko lah kabanyo di gaduang, koto rang agam, lah mulai ko lah manjua pabukoan, tungku pono?” Tanyo si Bujang.
Tadanga ado heboh antaro anggota dewan jo kasaik polPP, kabanyo satantang pasa pabukoan, iyo ko lah atau hoax, salo Labai Dullah.
Manuruik caritonyo iyo, anggota dewan dari PKS nan heboh baadu pandapek jo kasaik PolPP nantun, tarang Tuangku Pono.
Nan si kasaik ko manjalanan parintah berdasarkan paraturan daerah, nan pak dewan ko saolah mambela padagang. Lanjuk si Pono.
Kasaik ko, namo urang ko pono? Tanyo si Labai.
Nan kasaik ko singkatan dari kapalo satuan. Dalam hal nangko kasaik ko adolah kasaik PolPP, indak si isaik minantu Haji Yas doh, lai jaleh dek Labai, kecek si Kalapia jo nada tinggi.
Tagalak urang saisi kadai, mandanga namo si Isaik minantu Haji Yas.
Kadang antahlah, tapi ba’a lah… jawek rang kadai si Sutan Salamaik.
Nan kasaik ko manjalanan parintah perda, nan mansah-an perda tu tantu wakia-wakia rakyaik tu.
Ba,a lo kok heboh ka kasaik tu, kok ado nan salah jo perda tu, di bae baliak mamelok,an nan salah tu, atau dibuek perda baru.
Ko.. indak heboh jo kasaik. Himbau walikota tu ka kantua dewan tu, bahas disinan nama nan karancak jo nan kaelok untuak basamo, baiak pamarintah, baiak legislatif tantunyo untuak kapantiangan masyarakaik banyak. Carocoh Sutan Salamaik sambia mangocok teh talua.
Sabananyo sutan, ndak ado pulo nan salah doh, rancak sadonyo. Nan kasaik batua nan dewan nantun juo batua. Tapi momennyo nan kurang pas, mungkin. Kok untuang jadi pambahasan nan rancak bisuaknyo di rapek anggota dewan tu, atau duduak basamo jo walikota, tantu didangga pulo pandapek masyarakaik. jawek Tuangku Pono.
Nan jaleh balak anam pono lah mati, nan pasa pabukoan tu, satiok bulan puaso ado taruih. Namonyo se pasa pabukon. Jawek Kalapia.
Nan jaleh pilkada jo pileg lamo harinyo lai, indak paralu mode ayam tamakan abuak doh. Cah viral video…cah viral video… kok yo santiang, baa caronyo mambuek jam gadang tu rami dek wisatawan, oto sarok bisa baliak manampuah lambah anai, kota barasiah, wisatawan banyak tibo, tantu pitih banyak baredar di kota nantun. Tutuik kalapia.
Ota sudah, nan damino lah usai, duo kosong kamanangan malin kalapai nan bamandan jo Labai Dullah.
(iing chaiang)
Catatan redaksi: Kalau ada kesamaan nama tokoh, watak tokoh, kami mohon maaf, ini bukanlah disengaja.
Sumber gambar: Dola AI
