Nan Kito Antak Wakatu Pilkada Kapatang kan Bupati jo Wakianyo, Kok Kini Ado Pulo Oto Dinaih untuak Rang Rumah Liau
Sutan Salamaik, urang Lapau kupi duduak baduo jo Malin Kalapia, sambia manantikan sumandan untuak bamain koa atau domino.
“Jam baralah katibo konco arek lawan kareh Wak ko, Sutan? Lah taragak lo Wak mangalahan si bujang Jo Tuangku Pono.” Kecek Malin Kalapia.
Kabanyo, Tuangku Pono ka ibukota Kito di Lubuak Basuang, mauruih KK kamanakan Liau nan baru manikah kapatang, Malin. Jawek Sutan Salamaik.
Kaminum kupi atah teh talua, Malin ko? Tanyo Sutan Salamaik.
Teh talua lah lai, Sutan. Sarikapatang lah tibo pulo gaji rang rumah nan diagiah pamarintah tu. Ditukai pulo salero agak saketek… Sambia galak takekeh. (Dimano Malin Kalapia adolah salah satu panarimo program BLT dari pamarintah, walaupun dirumahnyo sagalo ado, mulai dari oto buruak, sampai ka garobak tuo, malahan lantai rumahnyo ba karamik bagai walaupun kamar mandi).
Teh Talua takacau, tibolah Labai Dullah.
Batuka salero Malin kini-ko yo sutan! Buek’an pulo Denai nan bantuak si Malin tu Sutan. Bilo lo ka dibaiya’an dek si Malin. Mintak Labai.
“Salero ko manuruik saku-saku kabanyo Sutan. Kalau dulu Iyo manuruik rangkuangan. Nan kini ko Salero manuruik banyak isi saku, kan yo mantun, Malin.”
“Maeboh sen si Labai mah. Mintak lah pisok agak duo bungkuih. Nan diambo nan biaso sen lah nan di Labai tasarah apo nan katuju.” Jawek Malin.
Diambo kalau kadibalian urang yo rokok jisamsu lah Sutan. Kalau ambo nan mambali biarlah rokok Lukman. Sabab ambo ba-prinsip mambali nan murah kok diagiah atau mamitak tantu nan maha, kecek Labai nan biaso maisok rokok murah jo ilegal.
Teh Talua tahidang, rokok talatak, bakisa carito satantang program Makan Bergizi Gratis, Huntara sampai carito anak artis Denada bagai.
Pokoknya carito indak bakasudahan antaro katigonyo.
Satangah jam tibolah Tuangku Pono sarato si Bujang. Mamintak kupi ka rang kadai sambia mamintak mie abuih padeh.
“Lapa juo paruik Wak dinyo. Lamo dijalan, singgah kamari sabanta sambia mancaliak-caliak bakeh galodo kapatang,” kecek Bujang.
Kamain Domino atau kamain karateh Koa, Kito samalam ko go? Tanyo Tuangku Pono.
Nan karateh Koa, lah ambo mintak tadi ka Sutan tu. Nan karateh biarlah ambo mambayianyo, jawek Malin Karapai nan sudah manarimo BLT.
Ba’a kabanyo satantang oto dinaih di Agam tu Tuangku? Tanyo si Labai Dullah. Dek Tuangku Pono lah ka Lubuak Basuang sahari cako, Mano tau ado infonyo, tambah si Labai.
Nan kini saliang maagiah klarifikasi antaro sekda jo inyiak dewan dari Hanura tu. Kabanyo oto dinaih tu untuak rang rumah Bupati jo rang rumah wakia Bupati.
Sacaro pangkaik, rang rumah Bupati ko kan ketua Tim Penggerak PKK ko.
PKK apo kapanjangannyo, Tuangku. Tarang’anlah ka-kami bia ndak jaleh pulo. Sebab nan Kito antak wakatu pilkada kapatang kan bupati jo wakianyo, kok kini ado pulo oto dinaih untuak rang rumah Liau ntun. Apokah lansuang kapalo dinaih pulo rang rumah Bupati jo wakia ko? Tanyo Malin karapai.
PKK tu kapanjangannyo, kalau indak salah Pemberdayaan Kesejahteraan Keluarga. Indak Kapalo Dinaih doh. Cuma baitu sampai ka rang rumah camaik, wali nagari sampai wali jorong. Kalau rang rumah dari urang bapangkaik tadi, otomatis manjadi ketua PKK. Lai jaleh di malin tu. Mode tu-lah kiro-kiro panjalehan singkeknyo. Tarang Tuangku Pono.
Kalau duo jo tigo, rang rumah Bupati Tantu sabanyak itu pulo oto dinaihnyo tu, sabab kato kuncinyo PKK untuak Keluarga Sejahtera sedangkan partai Bupati Kito kini-ko kalau ndak salah Partai Keadilan Sejahtera. Lai samo-samo mambaok’an kato sejahtera antaro PKK jo PKS nangko. Kecek Rang Kadai sambia mambaok karateh Koa.
Bisuakko tantu walinagari jo walijorong mamasuakan anggaran pulo untuak kendaraan dinaih untuak rang rumah baliau untuak program PKK. Nan rugi adolah walinagari nan bujangan tantu indak ado ibuk PKK nyo. Tarang Sutan Salamaik.
Nan oto dinaih atau onda dinaih atau PKK-PKK ndak jaleh diawak tu doh. Nan jaleh main Koa Kito lai. Kito sarahan ka wakia rakyat.
Karateh Koa dikacau, nan Tuangku Pono bamandan jo Si Bujang. Sedangkan Labai Dullah tetap bamandan jo Malin Karapai.
(iing chaiang)
Catatan redaksi: Kalau ada kesamaan nama tokoh, watak tokoh, kami mohon maaf, ini bukanlah disengaja.
Sumber gambar: Dola AI
