Kok Ambo Jadi Bupati, Helikopter Ambo Bali, Mangga Oto
Samanjak tatulih kaba barito di babarapo media, satantang pambalian oto dinaih di pamarintahan Kabupaten Agam. Baitupun manjadi bahan carito di babarapo Lapau kupi.
Tasabuik sanjo sasudah mugarik dihari Salasa dilapau kupi Sutan Salamaik, dimano Malin Kalapia nan acok maagiah kaba barito nan diraso agak manyaleneh, maajak Labai Dullah bacarito satantang inyiak dewan nan wakia rakyaik, heboh katiko rapek wakia rakyaik di gaduang nan dimuko kantua Bupati Agam ntun.
“Lai mandangga labai, Bahaso inyiak dewan Epi Suardi dari Partai Hanura tu, maebohan satantang pambalian oto dinaih? Kabanyo 3 oto nan dibali jo anggaran daerah?” Tanyo Malin Kalapia ka Labai Dullah.
Apo merek oto nan babali tu, kabanyo Malin? Tanyo Labai Dullah, sambia maisok rokok nan jaleh-jaleh ilegal. (Sajak rokok ilegal alah banyak tasirobok di kadai-kadai, tapaso Labai Dullah mambalinyo, sebab rokok Surya Ndak takao di Labai Dullah mambali lai doh).
Kabanyo Toyota Camry, Zenit jo Fortuner, Labai. Jawek Malin Kalapia.
Kok oto Carry, biaselah ndak dibalinyo dek pemerintah tu Malin, kok dapek sadoalahan Kapalo dinaih tu ba oto Carry tu, jawek Labai Dullah.
Takekeh galak rang Lapau, Sutan Salamaik. “Indak manangkok antene Labai bantuaknyo. Nan kecek Malin oto Camry, indak oto Carry doh… Kabacarito atau ka mamasan kupi bagai Labai jo Malin ko, ota lamak tapi kupi ndak bapasan bagai,” kecek Sutan Salamaik agak berang dek kupi alun juo dimintak Malin Jo Labai.
“Bueklah kupi duo karek, Sutan,” mintak Malin jo Labai.
Sabalun kupi tahidang, kaduo urang ko sibuk pulo jo carito satantang bantuan bancano alam, mancaritoan merek-merek mie instan nan dibagi-bagian wali jorong. Babagai merek mie nan dibaconyo, mulai nan raso ayam bawang sampai ka soto Medan Jo raso randang bagai. Mulai nan harago kurang dari Saribu sampai nan harago tigo ribu limo ratuih.
Kopi tahidang dimeja dihadapan Malin Jo Labai, tibolah Si Bujang jo Tuangku Pono kakadai Sutan Salamaik.
Main Domino lah Kito lai, lah cukuik rasonyo bapasang-pasangan, ambo bamandan Jo Bujang, kecek Tuangku Pono. Rang kadai bueklah kupi kadam tu agak satangah, mintaknyo ka rang kadai.
Domino dikacau si bujang.
“Heboh kabanyo inyiak dewan dari Hanura satantang Bali oto dinaih, lai dapek kaba Tuangku?” Tanyo Malin Kalapia. Sebab Tuangku Pono ko, Acok bagaua jo urang-urang gadang dan bapangkaik di nagari ko.
Itu hari Sanayan tanggal 2 kapatang tu Malin, wakia rakyaik ko rapek paripurna, babahas lah satantang oto dinaih baru ko. Mungkin inyiak dewan tu maraso dek sudah Kanai bancano, kurang tapek pulo rasonyo mambali oto baru ntun. Kabanyo 3 oto ntun untuk Bupati, Wakia bupati Jo Ketua DPRD. Tapi kalau pastinyo caliak se di gugel. Jawek Tuangku Pono.
Jalan dari Padang Lua ka Lubuak Basuang lah rancak ko lah Tuangku? Tanyo Malin.
Sangkek ntun ambo jo rang rumah ka Lubuak Basuang, banyak jalan nan kurang rancak, banyak nan batumbok-tumbok, saroman jo sarawa cabiak, dek paralu juo tapaso ditumbok jo dijaik, lakik ado pambali sarawa baru. Kecek Malin. Takekeh galak salapau nantun.
“Nan jalan, pasaran biaso acok buruak, nan balubang ditutuik baliak, sarancak jalan tol tantu indak, asa basilambek tantu Ndak taraso ayuak oto. Kecuali oto baru jo maha oulo balinyo, tantu jalan buruak, indak taraso goyangnyo doh.” Tarang Bujang.
Heboh juo satantang pambahasan jalan nantun. Sebab samo dikatahui bahasonyo Bupati jo katua DPRD ko dari ateh, mau tidak mau haruih manampuah Padang Lua kalau manuju ka Lubuak Basuang.
Jan dihebohan juo lai. Kok itu nan katuju di baliau tu kaba,a pulo lai. Nan wakia rakyaik tantu patuik batanyo tantang patuik jo mungkin sarato anggarannyo. Kecek Sutan Salamaik.
Kok ambo jadi Bupati, indak oto nan ambo Bali untuk kendaraan dinaih doh. Ambo mintak halikopter dek lantaran jalannyo di ateh langit, Ndak paralu jalan balubang bagai doh. Kok pai ka nagari-nagari bagai, ndak kanai macet pulo doh. Kecek Sutan Salamaik dek kaampek tamunyo mintak kupi cuma satangah. Heboh pulo bacarito satantang pamarintah.
Akia carito, dikacau lah damino nantun. Nan Si Bujang bamandan Jo Tuangku Pono. Sedangkan Malin bamandan jo Labai Dullah.
(iing chaiang)
Catatan redaksi: Kalau ada kesamaan nama tokoh, watak tokoh, kami mohon maaf, ini bukanlah disengaja.
Sumber gambar: Dora AI