Bialah Indak Dapek PKH jo Bantuan Talua Bagai… Asal Lai Dapek Karatu Barubek
Pagi-pagi si Bujang alah duduak tamanuang di kadai kupi, sambia maisok timbakau nan bapaluik jo daun anau. Sairuik duo hiruik kupi sambia mandeceh antaro rusuah jo berang.
Oi Sutan Salamaik, lah kanai cabuik pulo kartu BPJS Denai. Sabana tagagau Denai satantang kartu Sakik ko. Kok nyampang Sakik lah kacau kabirau bantuaknyo. Kecek Si Bujang.
Kaba baritonyo iyo bantuak itu, PBI JK (Penerima Bantuan Iuran Jaminan Kesehatan) nan manangguang iuran BPJS ko, samanjak februari 2026, kabanyo ado pambaruan data, Mano yang indak aktif diganti kapado yang layak mandapek,an BPJS nantun da Bujang. Kecek Sutan Salamaik.
Malin Karapai datang baduo jo Tuangku Pono, sambia mamintak kupi sarato lontong, kapado rang kadai.
Buruak bana roman Si Bujang bantuaknyo Tuangku, kecek Malin Karapai.
Takulai ranggah Wak dinyo, satantang BPJS nan dicabuiknyo dek pamarintah ko. Biasonyo BPJS ko dapek pulo maringanan biaya barubek, nan kini ko tantu indak bisa perai ka Puskesmas Jo Rumah Sakik lai doh. Nan tabedo apobilo dapek sakik barek, nan membutuhkan operasi. Jo apo kadisabuik untuak pambayia biaya di rumah Sakik nantun. Itu nan ambo paniang-an sajak cako. Kecek Si Bujang.
Satantang itu Iyo panik lo Wak ma-agak-i nyo. Sebab nan desil ko sarato pandataan ko banyak nan indak akurat. Tarang Tuangku Pono.
Apo Pulo Desil ko Pono, apokah Namo patugaih Kemensos kacamatan tu? Tanyo Malin Karapai.
Desil ko adolah sistim mangalompok,an kesejahteraan masyarakat, mulai dari nan paliang bansaik sampai paliang sejahtera. Inyo dari desil 1 sampai 10. Nan nomor satu tu sangaik bansaik, nan kaduo bansaik, nan katigo hampia bansaik, nan kaampek rentan bansaik sedangkan nan nomor limo nan hiduik pas-pasan. Umumnya kategori partamo sampai nan kaampek manarimo PKH, bantuan sembako, BPJS, Rehab sosial Jo bantuan sosiallainnyo. Nan nomor 5 kabanyo masih bisa dapek juo bantuan tapi nan di prioritaskan nan nomor 1-4. Sedangkan nomor 5-10 dimulai dari kelas nan mananggah sampai nan sejahtera, nan indak KA dapek bantuan dari pamarintah. Tarang Tuangku Pono nan labiah bailimu dari konco-konconyo.
Agak hati Denai, Iko ado juo basangkuik jo maubah KTP kapatang ko go, Pono. Jawek Malin Karapai.
Lah banyak masyarakat Kito nan maubah pakarjaannyo di KTP manjadi buruan tani. Kok di inok ranungi bana kato Buruah ko, panjang pulo pangana Wak dinyo. Kok petani masuak aka juo. Tapi Buruah tani ko… Yo payah lo manyabuikannyo. Kecek Karapai.
Itulah nan tabedo… Kecek Sutan Salamaik. Ka Tuhan Allah mintak kayo, ka pamarintah mintak bansaik. Padohal satiok warga negara ko satantang kasehatan rakyaik lah dijamin dek UUD 45. Kok Iyo di perai sajo lah masyarakat ko barubek jo sikolah ko. Kan sanang masarakaik.
Ko…indak babuek Desil-desil bagai, tapaso masarakaik mangicuah mangaku-ngaku bansaik bagai, ditanyo dek tukang data, lai basawah, baparak, baonda, baameh bagai…satiok ditanyo Inyo manjawek indak ado samiang. Kadang tapaso baduto dek harok dapek sembako jo PKH bagai. Sahuik Sutan Salamaik.
Di Denai.. biarlah indak dapek PKH jo bantuan Talua bagai… Asal lai dapek karatu barubek. Karatu BPJS tu Bana nan ambo butuhan kecek si Bujang.
Turuik se, kantua wali nagari bisuak Bujang, sampaian ka inyiak wali tu, Mano tau ado solusinyo bagai. Nan kini Kito karajoan kakok Kito dulu. Nan sanjo biko main koa atau damino Kito baliak. Ajak Malin Karapai.
(iing chaiang)
Catatan redaksi: Kalau ada kesamaan nama tokoh, watak tokoh, kami mohon maaf, ini bukanlah disengaja.
Sumber gambar: Dola AI
